عائشة عبد الهادي تكشف كواليس تهديدات القذافي بشأن العمالة المصرية

01:29 م 13/11/2026

كشفت عائشة عبد الهادي، وزيرة القوى العاملة السابقة، كواليس تعاملها مع أزمة العمالة المصرية في ليبيا أثناء توليها منصبها، مؤكدة أن معمر القذافي استخدم العمالة المصرية كورقة سياسية أكثر من مرة خلال عهدي الرئيسين الراحلين أنور السادات وحسني مبارك، وكان يهدد بذلك كثيرًا.

وقالت عائشة عبد الهادي، خلال بودكاست على فضائية العربية: "استخدمت العمالة المصرية كورقة سياسية من قبل الرئيس القذافي أكثر من مرة في عهد السادات ومبارك، وكان بيهدد كتير".

اقرأ أيضًا: عائشة عبد الهادي عن انتقادات توليها حقيبتي العمل والهجرة دون شهادة: مكنتش برد

وأضافت: "مقدرش أقول إني عملت حاجة في القصة دي وأنا نقابية، لكن وأنا وزيرة عملت.. كنت بروح ليبيا كتير، والتقيت بالعقيد القذافي مرة واحدة، وكنت بلتقي برئيس الوزراء "البغدادي"، وزهق مني وقالي هو مفيش وزير في مصر غيرك؟ قولتله فيه، هو أنت زهقت مني ولا إيه؟ قالي لأ، أصل انتي بقيتي وزيرة العمل في مصر وليبيا، وقالي الكلام دا قدام الدكتور نظيف رئيس الوزراء في الوقت دا".

عائشة عبد الهادي تكشف أسباب أزمة العمالة المصرية في ليبيا

تابعت وزيرة القوى العاملة السابقة: «الحظر كان على استخدام عمال مصريين في ليبيا.. رجال الأعمال في ليبيا يعملوا إيه علشان يحلوا المشكلة دي؟ ياخدوا العمال على إنهم سياحة ويروحوا هناك وبعد الـ3 شهور ميكونش عندهم إقامة ويبدأ الأمن يطاردهم، بس مين اللي مدخلهم بطريقة غير قانونية؟ ودا اللي كنت بتكلم فيه مع البغدادي".

وزيرة القوى العاملة السابقة: رفضت ترحيل العمال المصريين دون حصولهم على مستحقاتهم

أضافت عائشة عبد الهادي: "جه فترة قالوا إن العمال تمشي واللي معندوش إقامة هيكون معاه مخالفات يدفعها.. قولتله لأ، مش هتاخدوهم لحم وترموهم عضم.. الناس دي دخلت عن طريق مخالفين عندك وأدت دورها، انتوا بعد ما أدوا دورهم تقولوا لأ روحوا وادفعوا، دول هيقعدوا بكرامتهم وهياخدوا فلوسهم".

عائشة عبد الهادي: هددت بإعادة جميع العمال المصريين من ليبيا

استطردت: "هددت بقى هنا: قولتله على فكرة بكرة ممكن أجيب أسطول مصر للطيران ومصر للسياحة واخد كل عمال مصر وارجع بيهم مصر، بس شوف الشعب الليبي هيعمل فيكم إيه، دا مفيش بيت ملوش مصري أثر فيه".

تابع آخر أخبار مصراوي على Google News