حارس الأهلي السابق: أنا ضد الهجوم على حسام وبكرة نقول ولا يوم من أيامك يا صلاح
الأحد 15-11-2026 16:44 كتب: إيهاب الجنيدي
محمد صلاح وحسام حسن - صورة أرشيفية تصوير : آخرون
محمد صلاح وحسام حسن - صورة أرشيفية
انتقد أحمد شوبير حارس مرمى الأهلي ومنتخب مصر السابق، ما يحدث حاليا من البعض في الصراع المشتعل حول الهداف التاريخي لمنتخب مصر ما بين حسام حسن المدير الفني السابق لمنتخب الفراعنة ومحمد صلاح قائد المنتخب المصري الحالي.
وقال أحمد شوبير اليوم الأحد: "هكلم كلمتين في موضوع الهداف التاريخي لمنتخب مصر والصراع اللي موجود وأنا بكلم باحترام وبدي الكابتن حسام حسن احترامه برقم بقاله 20 سنة لم يتم تحطيمه، ومباراة أي سواتيني لم تحتسب لمحمد صلاح، لكن البعض عايز يحتفل بكابتن محمد صلاح مفيش مشكلة برضه، لكن مازال على الورق حتى هذه اللحظة لازال الهداف التاريخي لمصر هو حسام حسن، وينقص صلاح هدف واحد للحاق به".
اقرأ أيضًا: دموع محمد صلاح بعد وفاة جوتا.. شهادة تكشف حجم تأثره برحيل زميله
وتابع شوبير: "مازال في مباريات كثيرة لمحمد صلاح وأمامه الفرصة لتسجيل المزيد من الأهداف، ولكن لازم أكلم على حسام حسن كلاعب بمنتهى الاحترام وأنا لعبت مع حسام حسن كثير جدا، وشاركنا معا في 4 دورات أفريقية، فهو عشرة عمر طويلة جدا، وهكون أكثر المدافعين عنه وبما قدمه مع الكرة المصرية، وأنا ضد الهجوم على حسام حسن، إحنا كل ما حد يكون في موقع المسؤولية نحلف بيه وأول ما يمشي يبدأ التقطيع فيه، ودي بقت سمة عندنا للأسف في كل المجالات مش الرياضة بس".
واضاف شوبير: "عيب اللي بيحصل، البعض ماسك صلاح ضرب ضرب يابني صلاح ده لما يبطل هتقول ولا يوم من أيامك يا صلاح مش عشان هو كان أحسن ولا غيره الأحسن ولكن عشان التاريخ اللي عمله، والبعض الثاني ماسك حسام حسن تقطيع وهو كلاعيب تاريخ عظيم محصلش وكمدرب حقق أكثر مما كنا نحلم به بمراحل، طيب يعني مفيش كلمة شكر، طيب مفيش كلمة وداع طيبة فيه أيه يا جماعة هو أنت فكرك حسام بطل تدريب ما هيدرب تاني الفترة اللي جاية أندية ومنتخبات وقد يعود لمنتخب مصر".
